Scho vili Johr vorhär hei sech aube churz vor dr Fasnacht äs paar Musikante vor Musiggsöuschaft Bützbärg zämeto und ä chlineri Kapäue gründet, um ar Fasnacht d’Bewohner vo Thunstette-Bützbärg musikalisch z’ungerhaute. A däm grosse Fescht het me de vor auem d‘ Beize vom Dorf ufgsuecht. Am Fritig Obe het me dört de Lüt bis spät id Nacht Schnitzubänk, Ungerhautigs- und Vouksmusig vortreit. Am Samschtig het me aber de scho wieder früh ufmüesse, do me de Lüt Ärbsesuppe het wöue verchoufe, um näbe de Inahme vo de Ständli vor Musig Bützbärg no ä chlinere Batze het chönne derzueverdiene. Me isch de vo Quartier zu Quartier marschiert und het die feini Suppe verchouft währenddäm d’Kapäue äs paar Musigstück gspilt het. Am Nomitag het me dr Chinderumzug musikalisch begleitet. Dr Sunntig isch houptsächlech zum Erhole gsi. Das het me de ou nötig gha, sig’s wägem Blose oder ou wägem Aukehou. D’Fasnacht isch langsam am Ändi zugange. Am Zischtig, ar Uslumpete, het me aber de nomou aues gä und sech scho wieder nach dr nöchschte Fasnacht gsehnt. So isch äs vo Johr zu Johr in etwa zue und här gange, bis zumene bestimmte Zytpunkt...

Im Früehlig 1998, grad nach dr Fasnacht, hei vili jungi Musikante (ä relativ grosse Ateil) vor Kapäue meh oder weniger d’Nase vou gha. Me het vor auem dä unpassendi Musigstiu für anere Fasnacht kritisiert. So hei vili Jungi ire „richtige" Guggemusig wöue spile. Do het öppis muesse passiere. D’Zuekunft wär für d’Kapäue nid gsicheret gsi. So hei sech äs paar vor Kapäue mou ame Obe zämegsetzt (Schäfi, Düge, Sigi, Ursle) und das Problem besproche. Äs isch nid lang gange und scho isch klar gsi, dass mir dr aut Musigstil ar Fasnacht ufgä und derfür mit zytgemässere Fasnachtsmusig ersetze. Dä Entscheid isch de vo de angere Mitglieder eistimmig für guet gheisse worde. Me het ire iberuefene Sitzig die nöii Guggemusig, nach längerem hin und här, uf dr Name „Schlossgeischter" touft. Nachdäm mir üsi erschti Fasnacht mit Erfoug im nöie Musigstiu hei chönne dürefüere, hei mir bestätigt übercho, dass mir dr richtig Entscheid troffe hei. So isch doch die Guggemusig stetig am wachse und d‘ Mitglieder si wieder motiviert, was jo ou zugunschte vo üsere übergeordnete Musiggsöuschaft Bützbärg isch.

Im Jahr 2013 het sech d Guggemusig Schlossgeischter chli abgnablet vo dr Musiggseuschaft Bützbärg u isch es Bitz eigeständiger Ungerwägs. Do derzue het me es OK gründet, wo jetz dä Hufe duet organisiere u leite.

Ufd Fasnacht 2018 heimer de Bitritt id LFG gwagt und hei de gad de Gönnerobe im Bäre dörfe eröffte. Was fürne grossi Ehr und tolli Erfahrig. Aschliessend isches witer gange, a die angere Standorte vom Gönnerobe, womer ouno es paar Stück zum Beste gäh hei.

Am Samstig Obe heimer de ou gad s erschte Mau am Guggespektaku ir Märitgass gspiut. Zerst uf der Choufhüsi-Bühni und aschliessend uf der Düby-Bühni gspiut.